Paytaxtın Sabunçu rayonu, Pirşağı qəsəbəsindəki 188 saylı orta məktəbdə kütləvi dava olub. Dava 5 və 15-16 nəfərlik iki qrup arasında baş verib. Bu haqda bu gün, 25 yanvar tarixində Bakuplus.az Metbuat.az-a istinadən məlumat verir.
KİV ilə əlaqə saxlayan valideyn bildirib ki, davanı “təşkil edən” Məhərrəm adlı 9-cu sinif şagirdi 8-ci sinif şagirdinə dəfələrlə sataşıb:
“Dava 2 gün əvvəl olub. Bir neçə dəfə sataşıb oğluma. Sonuncu dəfə digər şagirdləri də yığaraq üstünə gəlib. Başından zərbələr endiriblər. Həmin uşaq bıçaq gəzdirir, məktəbin problemli şagirdlərindən biridir”.
Valideyn bildirib ki, məktəb rəhbərliyi və aidiyyəti qurumlar həmin şagirdin bıçaq gəzdirdiyinə görə hələ də tədbir görmədiyi üçün övladını dərsə göndərməyə qorxur. Şagird hətta davaya getdikləri görüntüləri çəkərək TikTok hesabında paylaşıb.
Məsələ ilə bağlı Bakı Şəhəri üzrə Təhsil İdarəsindən bildirilib ki, hadisə məktəbin yaxınlığında baş verib və lazımi tədbirlər görülüb:
“188 nömrəli tam orta məktəbdən verilmiş məlumatda qeyd olunur ki, 23 yanvar 2024-cü il tarixində dərsdən sonra, saat 15:00 radələrində məktəbdənkənar ərazidə şagirdlər arasında dava olub. Məktəb rəhbərliyi məsələdən xəbər tutan kimi valideynlər məktəbə dəvət olunublar, onlarla söhbət aparılıb, müvafiq qaydada izahatları alınıb. Məsələ ilə əlaqədar hüquq-mühafizə orqanlarına məlumat verilib”, – açıqlamada deyilir.
