Sabunçu rayonu, Pirşağı qəsəbəsinin Bağlar massivi adlanan ərazisində yalnız 173B saylı marşrut avtobusu işləyir ki, o da saatlarla gəlmir. Bu haqda bu gün, 8 iyul tarixində Bakuplus.az Baku TV-yə istinadən məlumat verir.
“40 dəqiqə, bəzən olur bir saat insanlar yollarda qalırlar. Təsəvvür edin, mən indi dayandığım yerdən kəndin mərkəzinə iki kilometrdir. Bu yolu insanlar piyada gedirlər. Burada dayanacaq problemi də var. Kənnddə bir şüşəli dayanacaq görməmişəm”, – deyə sakinlər şikayət edirlər.
Vətəndaşların əksəriyyəti taksidən istifadə etsə də, son vaxtlar qiymətlərin bahalaşması səbəbindən onların çoxu bu nəqliyyat növündən razı deyil.
Sürücülərdən biri problemi xəttə buraxılan avtobus sayının az olduğu üçün yaşandığını bildirdi.
Ərazidə yaşayan sakinlər su problemindən də əziyyət çəkdiklərini, içməli və kanal suyuna həsrət qaldığlarını deyirlər.
“Həftələrlə su görmürük. Mən burada 45 ildir yaşayıram, hələ də su problemi həll olunmayıb”, – deyə sakin narazılığı bildirib.
Marşrut avtobuslarının az olması məsələsi ilə bağlı Azərbaycan Yerüstü Nəqliyyat Agentliyindən bildirildi ki, problemin aradan qaldırılması üçün göstəriş verilib. 173B nömrəli marşrut xəttində 6 avtobus sərnişinlərə xidmət göstərir. Günün pik saatlarında avtobusun keçdiyi küçə və prospektlərdə müşahidə edilən sıxlıq səbəbindən marşrut xəttində ləngimələr yaranır. Sözügedən marşrutun daşıyıcısına gündəlik xəttə çıxan nəqliyyat vasitlərinin sayının sərnişin tələbatına uyğun tənzimlənməsi və hərəkət cədvəlinə ciddi riayət olunması ilə bağlı tapşırıq verilib.
Su probleminə gəlincə Azərbaycan Dövlət Su Ehtiyatları Agentliyindən şifahi olaraq bildirildi ki, sözügedən ərazidə Sabunçu Sukanal İdarəsinə məxsus su şəbəkəsi mövcud deyil. Yeni su şəbəkəsinin qurulması mərhələli şəkildə icra edilir.
