"Bildirilir ki, qeyd olunan bina prokurorluq işçilərinin mənzil şəraitinin yaxşılaşdırılması məqsədilə "Qayğı" Mənzil Tikinti Kooperativinin sifarişi əsasında podratçı tərəfindən inşa edilmiş və hazırda binanın saxlanması, kommunal və digər xidmətlər həmin MTK tərəfindən həyata keçirilir. Həmin MTK-nın prokurorluq orqanları ilə hər hansı bağlılığı yoxdur", - Baş Prokurorluqdan məlumat verilib.
14:38 - Prokurorluq işçiləri üçün tikilmiş binada yaşayan sakinlər hər gün təhlükə ilə üzləşirlər
Bakının Xətai rayonunun Ceyhun Həsənov, 81 ünvanında yaşayan sakinlər yaşayış şəraitindən narazıdırlar. Bu barədə görüntülər sosial şəbəkələrdə yayılıb. Bu haqda bu gün, 14 iyun tarixində Bakuplus.az Oxu.az-a istinadən məlumat verir.
Sakinlərin sözlərinə görə, onlar 2022-ci ildə həmin binaya köçdükdən sonra müxtəlif problemlərlə üzləşiblər:
“Bizim bina Baş Prokurorluq tərəfindən işçiləri üçün tikilib. Həmin işçilər də evi satıblar, biz almışıq. Binada problemlər dəhşətli həddədir. Zirzəmidə daimi qrunt suları var, divarlar artıq erroziyaya uğramağa başlayıb, parklanma sahəsinə girirsən, biabırçılıqdır. Divarlar nəmişlik içindədir. Hər yer zibil tullantısı ilə doludur. Sahibsiz və ya hələ təmir olunmamış evlərin pəncərələri sökülüb yerə düşür. Hər küləkdə böyük parça şüşə düşür. Avtomobillərin üstünə düşməyi də olub. Şükür ki, hələ insan üstünə düşməyib”.
Sakinlər məsələ ilə bağlı Azərbaycan Respublikasının Baş Prokurorluğu, Fövqəladə Hallar Nazirliyi, Bakı Şəhəri Xətai Rayon İcra Hakimiyyəti və digər qurumlara müraciət etsələr də, heç bir müsbət nəticə olmayıb.
