Suraxanı rayonu, Zığ kəndi, İdris Süleymanov küçəsində kanalizasiya xəttinin olmaması sakinləri narahat edir. Bu haqda AZTV reportaj hazırlayıb.
Sakinlər bildirir ki, sözügedən küçədə kanalizasiya sistemi yoxdur və bu hal antisanitar şəraitin yaranmasına gətirib çıxarır.
Burada yaşayanlar uzun müddətdir ovdan suyundan istifadə ediblər. Qəsəbə içməli su ilə təmin olunduğundan, çıxış tapa bilməyən ovdan suyu sıradan çıxmış kanalizasiya xəttinə axır. Payız və qış mövsümündə isə yağıntılar səbəbindən əmələ gələn gölməçələrin yanından keçmək olmur. Kanalizasiya xətləri köhnəldiyinə görə sakinlər çirkab suları axıtmaq üçün öz həyətlərində quyular qazıblar.
Mərkəzləşdirilmiş kanalizasiya ilə yanaşı, sakinlər asfalt yolların olmamasından da şikayətlənirlər.
Azərsu ASC-nin mətbuat katibi Anar Cəbrayıllının sözlərinə görə, Zığ qəsəbəsinin adıçəkilən ünvanında mərkəzləşdirilmiş kanalizasiya infrastrukturu qurulmayıb. Burada yaranan tullantı suları açıq kanallarla və yaxud insanlar tərəfindən çəkilmiş fərdi xətlərlə kənarlaşdırılır. Amma Abşeron yarımadası üzrə baş planda həmin ərazidə həm mərkəzləşdirilmiş su, həm də kanalizasiya infrastrukturunun yaradılması işləri mərhələli şəkildə həyata keçiriləcək. Eyni zamanda dövlət investisiyaları hesabına tullantı su infrastrukturunun da bərpasına başlanılacaq.
Sakinlərin yolla bağlı çətinliklərinin aradan qaldırılmasına gəlincə isə, yalnız kanalizasiya xətləri yeniləndikdən sonra yol infrastrukturunun həlli barədə danışmaq olar.
