Bakının Qaradağ rayonu, Qızıldaş qəsəbəsində sakinlər uzun müddətdir çirkab suların sızmasından əziyyət çəkirlər. Bu haqda bu gün, 20 noyabr tarixində Bakuplus.az ARB Xəbər-ə istinadən xəbər verir.
Sözügedən ərazidə kanalizasiya xətti mövcud olmadığına görə çirkab sular açıq şəkildə axaraq ətrafa kəskin qoxu yayır. Həmçinin sakinlər bildiriblər ki, yağış yağan kimi sular dolaraq evin altına daşır. Əlavə olaraq, bəzi sakinlər öz hesabına boru çəksələr də, bu, ümumi vəziyyətə təsir etməyib.
Rayon İcra Hakimiyyətinin nümayəndəsi Cahangir İsmayılovun sözlərinə görə, məsələ ilə bağlı əraziyə baxış keçirilib. Problemlə bağlı “Azərsu” ASC-yə müraciət edilib. RİH-nin rəsmisi də razılaşıb ki, 5000-dən çox əhalisi olan bir qəsəbənin kanalizasiya problemini bir iki nəfər həll edə bilməz.
“Azərsu” ASC-nin mətbuat katibi Anar Cəbrayıllının verdiyi məlumata görə, Qızıldaşda “Azərsu” ASC-yə məxsus mərkəzləşdirilmiş kanalizasiya xətləri yoxdur.
“Abşeron yarımadasının su təchizatı, kanalizasiya sistemi və yağış suları sisteminin inkişafı ilə bağlı master-plan var və həmin master-plana əsasən, Qızıldaş qəsəbəsində, Qaradağ rayonunun digər qəsəbələrində kanalizasiya şəbəkəsinin qurulması, kanalizasiya kollektorunun və təmizləyici qurğunun tikintisi nəzərdə tutulub”, – deyə qurumun mətbuat katibi əlavə edib.
