Bakıda “Qala Etno Fest” tədbirinə start verilir. Bu haqda bu gün, 31 may tarixində Bakuplus.az “İçərişəhər" Dövlət Tarix-Memarlıq Qoruğu İdarəsinə istinadən xəbər verir.
Bu gün "Qala" Dövlət Tarix-Etnoqrafiya Qoruğunda “Qala Etno Fest”ə start verilir. 3 gün davam edəcək festivalda Azərbaycan xalqının qədim etnik ənənələrini təcəssüm etdirən böyüklər və uşaqlar üçün interaktiv fəaliyyətlər, sərgilər, ustad dərsləri və yarışlar təşkil olunacaq, Qala Etno Bazarın və “Qala tarixi fotorlarda” sərgisinin açılışı baş tutacaq.
Ərazidə dulusçuluq, xalçaçılıq, boyakarlıq, dəmirçilik, qurama, keçə sənəti, zərgərlik, vitraj, ağac oyma, keramika rəngləmə, ebru və şam düzəltmə üzrə ustad dərsləri təşkil olunacaq.
Həmçinin festivalda “Qala tarixi fotolarda” sərgisi ziyarətçilərə təqdim olunacaq. Eləcə də oxatma, mars güləşi kimi tədbirlərdə iştirak etmək mümkün olacaq.
Bundan əlavə, ənənəvi sənət növlərinin sərgiləndiyi karvansara üslubundakı Qala Etno Bazar qonaqlar üçün qapılarını açacaq.
Festival 2 iyun tarixinə qədər davam edəcək.
