Xəzər rayonu, Qala qəsəbəsi, Südçülük sovxozu adlanan ərazidə içməli suyun əvəzinə kranlardan qırmızı rəngli duzlu su gəlir. Bu səbəbdən sakinlər tələbatını su maşınları ilə təmin edirlər. Bu haqda bu gün, 21 iyun tarixində Bakuplus.az Real TV-yə istinadən məlumat verir.
Qonşuların iddiasına görə, quyudan gələn suyu istismara yararsız edən özünəməxsus rəngi və duzlu olmağı deyil. Ərazidə kanalizasiya sistemi olmadığı üçün çirkli sular şambolara axıdılır. Şambolar isə su quyularına məsafəcə yaxındır, bu da çırkli və təmiz suyun bir birinə qarışmasına, nəticə etibarilə antisanitariyaya gətirib çıxarır.
Bu isti havalarda sakinlərin problemi təkcə susuzluq deyil. Şikayətçilər deyirlər ki, ərazidə zibil konteynerləri olmadığı üçün məhəllə özü zibilxanaya çevrilib.
Daha bir acınacaqlı fakt tullantıların ətrafa yaydığı üfunətin fonunda uşaqların oyun oynamalarıdır. Bir sözlə, içməli suya əlləri çatmayan sakinlər digər tərəfdən natəmizlikdə yaşamağa məcburdurlar.
İnsanları narahat edən daha bir məsələ küçələrin adlarının olmamasıdır. Evlərin əksəriyyəti qanunsuz tikildiyinə görə burada heç bir küçənin adı yoxdur, bu da həm vətəndaşlar, həm də müvafiq strukturlar üçün problem yaradır.
Problemləri ilə bağlı Xəzər RİH başçısı aparatının şöbə müdiri Şahin İsgəndərov ilk növbədə küçələrin adları məsələsinə və zibil qutuları probleminə aydınlıq gətirib:
“Qeyd etdiyiniz ərazi Qala qəsəbəsi, 156 və 158-ci Qala küçələrini əhatə edir. Xəzər rayonu, Qala qəsəbəsinin ərazisində əmələ gələn bütün bərk məişət tullantılarının yığılması və daşınması işləri “Təmiz Şəhər” ASC tərəfindən həyata keçirilir. Bununla əlaqədar olaraq, sözügedən əraziyə məişət tullantıları üçün nəzərdə tutulmuş konteynerlərin yerləşdirilməsi ilə bağlı RİH tərəfindən “Təmiz Şəhər” ASC-yə müraciət ünvanlanmışdır”.
Həmçinin əhalinin su probleminə toxunan şöbə müdiri bildirdi ki, Xəzər RİH tərəfindən “Azərsu” ASC-yə ünvanlanmış müraciətlərə cavab olaraq bildirilmişdi ki, Qala qəsəbəsinin su təminatı tullantı sularının mərkəzləşdirilmiş qaydada kənarlaşdırılması məqsədilə müvafiq layihələr tərtib olunmuşdur. Qeyd olunanları nəzərə alaraq, Qala qəsəbəsinə içməli su təminatı sisteminin inşası işlərinin icrası cəmiyyətin tədbirlər planına uyğun mərhələlərlə həyata keçiriləcək.
Dövlət Su Ehtiyatları Agentliyinin iri şəhərlərin birləşmiş su təchizatı xidmətindən də məsələ ilə bağlı bildirildi ki, qeyd olunan ərazidə mərkəzləşdirilmiş su şəbəkəsi mövcud deyil. Hazırda Qala qəsəbəsinin bir hissəsində içməli su şəbəkəsi yaradılıb. Həmin ərazidə içməli su şəbəkəsinin yaradılması perspektiv layihədə nəzərdə tutulub və mərhələli şəkildə həyata keçiriləcək.
