Suraxanı rayonu, Qaraçuxur qəsəbəsi, Nizami İsmayılov küçəsi, 6 ünvanında bina və məhəllə illərdir baxımsız vəziyyətdədir. Bu haqda bu gün, 1 mart tarixində Bakuplus.az Real TV-yə istinadən xəbər verir.
Sakinlərin sözlərinə görə, 48 il əvvəl inşa olunan binada 90 ailə yaşayır, ancaq sakinlər qurumların onları unutduğunu vurğulayırlar. Burada təhlükəli məhəccərlər, qırıq pəncərələr və natəmizlik hökm sürür.
“Neçə dəfə az qala yıxılırıq, pəncərələr insanların başına tökülür, düşüb-çıxa bilmirik. Küçələr də kələ-kötürdür, hərəkət edə bilmirik”, – deyə sakinlər şikayət edirlər.
Binanın yerləşdiyi küçədə asfalt dağılmış-tökülmüş vəziyyətdədir, binanın özü isə nəm və baxımsız haldadır.
Sakinlərin sözlərinə görə, onların yaşadıqları bina unudulub və heç bir qurum köməklik etmir:
“Binanın özü Suraxanı rayonunda yerləşsə də, köhnə bina olduğuna görə, o vaxtdan qalıb Sabunçu rayonu “jek”inin balansında. O da uzaqda olduğuna görə bura heç baxılmır. 2020-ci ildə söz verdilər ki, nəsə edəcəklər, amma 4 ildir vəziyyət eynidir”, – deyə sakinlər əlavə ediblər.
3 nömrəli xüsusi təyinatlı mənzil kommunal təsərrüfat birliyinin 39 saylı mənzil kommunal istismar sahəsindən məsələ ilə bağlı bildirilib ki, bina 2022-ci ildə əsaslı təmir olunub. Yolların yenidən qurulması üçün isə Bakı ŞİH-yə müraciət edilib.
“Binanın ətrafyanı sahələri gündəlik mütəmadi olaraq süpürülür və məişət tullantıları gündə 1 dəfədən az olmamaq şərti ilə ərazidən kənarlaşdırılır. Blokların daxilində, mənzillərin qarşısındakı sahələr isə vətəndaşların özləri tərəfindən süpürülməlidir”, – deyə qurum əlavə edib.
