Suraxanı rayonu, Qaraçuxur qəsəbəsində məktəbli qızı təqib etməkdə təqsirləndirilən şəxsə hökm oxunub. Bu haqda bu gün, 13 noyabr tarixində Bakuplus.az Qafqazinfo-ya istinadən məlumat verir.
Şikayətçinin ərizəsinə görə, “VAZ-2104” markalı avtomobilin sürücüsü dərsdən evə qayıdan 14 yaşlı qızını israrla təqib edib. Bundan sonra polis əməkdaşları tərəfindən əməliyyat-axtarış tədbirləri həyata keçirilib və hadisəni törətmiş 42 yaşlı S.Salahov (şərti) saxlanılaraq 32-ci PB-yə aparılıb. Faktla bağlı inzibati protokol tərtib edilərək Suraxanı Rayon Məhkəməsinə göndərilib.
“3-4 ay olar ki, *** nömrəli orta məktəbdən evə gələrkən “VAZ-2104” markalı minik maşını ilə bir nəfər orta yaşlı kişi məni izləyir. Mən dayananda maşını saxlayıb mənə baxır və həmin şəxsin bu hərəkətlərindən qorxaraq yolumu dəyişib başqa yolla evə gedirəm.
Sonuncu dəfə də Qaraçuxurda həmin maşın məni izləyərkən yolun qarşı tərəfinə keçdim, bir az getdikdən sonra maşını saxlayaraq mənim gəlməyimi gözlədi. Maşının pəncərəsindən gözlərini zilləyərək mənə baxırdı. Həmin şəxsi görərkən qorxudan gedə bilmədim. Maşının yaxınlığından keçərkən həmin şəxs maşının qapısını açıb düşmək istədi. Mən də yoldan keçən bir tanımadığım qadına yaxınlaşdım. Həmin qadınla bir az getdikdən sonra fikirləşdim ki, evə qayıtmalıyam. Geri qayıdarkən gördüm ki, yenə də həmin maşın dayanıb və məni gözləyir”, – qız məhkəmədə deyib.
Saxlanılan kişi isə həmin qızı tanımadığını deyib. Kişinin sözlərinə görə, o, küçələrdən, marketlərdən karton və plastmas toplayaraq müəssisələrə təhvil verərək ailəni dolandırır. Kişi bildirib ki, onun 9 uşağı var, onlardan beşi də qız uşağıdır.
Suraxanı Rayon Məhkəməsinin qərarı ilə, həmin şəxsə bəraət hökmü oxunub. O, məhkəmə zalından sərbəst buraxılıb.
