Bakının Qaradağ rayonu, Müşfiqabad qəsəbəsindəki Yeni yaşayış massivində yerləşən park yararsız vəziyyətə düşüb. Bu haqda bu gün, 28 dekabr tarixində Bakuplus.az ATV News-a istinadən xəbər verir.
Sakinlərin sözlərinə əsasən, sözügedən parkda quraşdırılan futbol meydançası, söhbətgahlar dağılıb, ağaclar baxımsızlıqdan quruyub. Ərazidə zibil qabları olmadığına görə insanlar məişət tullantılarını boş yerlərə atırlar. Bu səbəbdən ərazidə antisanitar vəziyyət yaranır.
Sakinlərdən biri bildirib ki, onlar öz vəsaitləri hesabına 300 ağac əkərək sulayırdılar, lakin naməlum şəxslər gecə vaxtı ağacları yerindən çıxarıblar.
“Əvvəl işıqlandırma sistemi, fəvvarələr, oturacaqlar, hər bir şərait var idi. Demək olar ki, bütün əhali bu parka gələrək vaxtını keçirirdi. Lakin indi burada heç nə qalmayıb”, – sakinlərdən biri şikayət edərək bildirib.
Park Qaçqınların və Məcburi Köçkünlərin İşləri Üzrə Dövlət Komitəsinin balansındadır. Qurumdan verilən məlumata görə, gələcək zamanda ərazidə təmir-bərpa işlərinin başlanması planlaşdırılır və park əvvəlki vəziyyətə qaytarılacaq.
