Qaradağ rayonu, Lökbatan qəsəbəsi ərazisində yerləşən, şəhid və qazi ailələrinin yaşadığı kompleksdə bankomat yoxdur. Buna görə də sakinlər təqaüdlərini və sosial müavinətlərini almaq üçün 5-6 kilometr məsafəni qət etmək məcburiyyətində qalırlar. Bu haqda Xəzər Xəbər reportaj hazırlayıb.
Sakinlər deyirlər ki, həmin şəhərcikdə digər vətəndaşları da nəzərə alsaq, ümumilikdə 700 ailə məskunlaşıb.
Əlacsız qaldıqlarından, əlilliyi olan şəxslər pensiya və ya sosial müavinətlərini almaq üçün kompleksdə yaşayan digər şəxslərdən xahiş edirlər ki, onlar şəhər mərkəzinə gedərkən pulu bankomatdan çıxarsınlar. Sakinlər deyirlər ki, üzləşdikləri problemlə əlaqədar dəfələrlə banklara müraciət ediblər.
Məsələ ilə bağlı Kapital Bankın İctimaiyyətlə əlaqələr şöbəsinin rəisi Pərviz Sədrəddinov bildirdi ki, sakinlərin bu problemi araşdırılacaq. O, həmçinin qeyd elədi ki, sakinlər Kapital Bankın istənilən filialına müraciət edə bilərlər. Bankın daxili proseduruna, həmçinin təhlükəsizlik qaydalarına uyğun gələrsə, həmin ərazidə bankomatın quraşdırılması həyata keçiriləcək.
Azərbaycan Beynəlxalq Bankının mətbuat katibi Yadigar Cəfərli isə dedi ki, həmin sakinlərlə əlaqə yaradılacaq və müraciətləri araşdırılacaq. Sözügedən ərazidə bankomatın quraşdırılması üçün lazımi tədbirlər görüləcək.
