Qaraqan ləqəbi ilə tanınan reper Elxan Zeynallının yeni mahnısı cəmiyyətdə canlı müzakirələrə səbəb olub. Bu haqda bu gün, 5 dekabr tarixində Bakuplus.az məlumat verir.
Uzun fasilədən sonra dekabrın 1-də beynəlxalq musiqi platformalarında təqdim olunan “Qızım” mahnısı 4 selektiv abortun qarşısını alıb. İfaçı tərəfindən yayılan məlumat görə, son günlər 4 hamilə qadın mahnını dinləyəndən sonra ona yazıb. Qadınlar müxtəlif səbəblərdən övladlarını abort etmək istədiklərini, lakin mahnıya qulaq asandan sonra fikirlərindən daşındıqlarını bildiriblər.
Müğənni, həmçinin onu da qeyd edib ki, o dörd körpənin bütün doğum xərclərini və ilk aylar bütün maddi xərclərini öz üzərinə götürəcək.
Yeni mahnıda Qaraqan bütün xalqın qızlarına və gələcək nəsillərə müraciət edir. Atanın qızına fədakarlığı kimi səslənən bu mahnı cəmiyyətdəki böyük məsələlərə işıq salır. İfaçı cəhaləti təkcə keçmişdən deyil, gələcəkdən də gələ biləcəyini deyir. Elmi inkişafın bizə bəxş etdiyi selektiv abort da belə cəhalətlərdən biridir.
Elxan Zeynallı 2007-ci ildən 2012-ci ilədək H.O.S.T. rep qrupunun solisti olub. Daha sonra solo ifaçı kimi karyerasını davam etdirib.
