Bütünay Haqverdiyevin Bakıda fərdi sərgisi baş tutacaq. Bu haqda bu gün, 14 dekabr tarixində Bakuplus.az Bakı Rəssamlıq Qalereyasına istinadən xəbər verir.
“Yarımadanın gündəliyi” adlı fərdi sərgidə konseptual heykəltaraş və rəssam Bütünay Haqverdiyevin Abşeronun sənədli xronologiyası, Abşeron kəndlərinin mənzərəsinin “fotoyaddaş”ı ilə ərsəyə gətirdiyi əsərləri nümayiş olunacaq.
Bütünay Haqverdiyev Əzim Əzimzadə adına Azərbaycan Dövlət Rəssamlıq Məktəbində və Moskvada Britaniya Ali Dizayn Məktəbində oxuyub. O, bir neçə kollektiv sərgidə, o cümlədən 55-ci Venesiya biennalesində, eləcə də fərdi ekspozisiyalarda iştirak edib.
B.Haqverdiyev tanınmış təsviri sənət ustası Ucal Haqverdiyev və rəssam Yelena Haqverdiyevanın oğludur.
Tədbir 16-30 dekabr tarixlərində “QGallery”də baş tutacaq.
