Bakının Ramana qəsəbəsində piyadaların təhlükəsizlik səviyyəsi artırılacaq. Bu haqda 20 iyul tarixində Bakuplus.az Bakı Nəqliyyat Agentliyinə istinadən məlumat verir.
BNA vətəndaşların müraciətlərini nəzərə alaraq Sabunçu rayonunun Ramana qəsəbəsinin 3-cü sahə adlanan ərazisində bir sıra tədbirlərin icrasına başlayıb.
Əvvəlcə qeyd olunan yol sahəsində təhlillər aparılıb və müəyyən çatışmazlıqlar aşkar edilib:
- Piyadaların hərəkəti üçün səkilərin nəzərdə tutulmaması;
- Nəqliyyat vasitələrinin icazə verilən sürət həddini aşması nəticəsində yol nəqliyyat hadisələrinin başvermə riskinin yüksək olması;
- Eynisəviyyəli piyada keçidlərinin, müvafiq yol nişanları və nişanlanma xətlərinin nəzərdə tutulmaması.
Qurum tərəfindən həyata keçirilən tədbirlər:
- Avtomobil yolunun oxu saxlanılmaqla, hər iki istiqamət üzrə ümumilikdə, 950 m uzunluğunda səkinin, həmçinin əlilliyi olan şəxslərin, yaşlı insanların və uşaq arabalarının rahatlığı və təhlükəsizliyinin təmin edilməsi məqsədilə pandusların inşası;
- Eynisəviyyəli piyada keçidlərinin təşkil edilməsi;
- Yol-nəqliyyat hadisələrinin başvermə riskini azaltmaq, yol hərəkəti təhlükəsizliyini artırmaq məqsədilə icazə verilən sürət həddinin 40 km/saata endirilməsi;
- Daxili yollardan əsas yola giriş-çıxış yerlərində müvafiq yol nişanlarının quraşdırılması və üfüqi nişanlama xətlərinin çəkilməsi.
Görülən işlər sayəsində bu ərazidə yaşayan 6000 nəfərdən artıq sakinin rahat, maneəsiz və təhlükəsiz gediş-gəlişi təmin olunacaq.
