Bakının bir sıra ərazilərində dayanacaqlarla bağlı çətinlik yaşanır. Bu haqda bu gün, 20 fevral tarixində Bakuplus.az Xəzər Xəbər-ə istinadən məlumat verir.
Aeroport şosesindən Ramana qəsəbəsinin Şuşa şəhərciyi istiqamətində dayanacaq məntəqələrində pavilyonlar yoxdur. Bu da həm küləkdə, yağışda, həm də günəşli havada avtobus gözləyən sərnişinlərin narahatlığına səbəb olur.
Qəsəbə sakinlərinin sözlərinə görə, ərazidə ödəniş terminallarının olmaması da hər gün ictimai nəqliyyatdan istifadə edən şəxslər üçün çətinlik yaradır.
Azərbaycan Yerüstü Nəqliyyat Agentliyindən bildirilib ki, avtobus dayanacağı pavilyonları quraşdırılan zaman yol infrastrukturunun vəziyyəti nəzərə alınır.
“Bu istiqamətdə mütəmadi olaraq təhlillər aparılır. Mövcud səki infrastrukturu və əhalinin gediş-gəlişi nəzərə alınaraq, ya dayanacaq pavilyonları quraşdırılır, ya da dayanacaq nişanları qoyulur. Aeroport şosesindən Ramana qəsəbəsinin Şuşa şəhərciyi istiqamətində dayanacaq məntəqələlərində pavilyonların quraşdırılmaması səkilərin ensiz olması, bir çox yerlərdə isə ümumiyyətlə, olmaması ilə bağlıdır. Bu səbəbdən qeyd olunan yol üzərində tərəfimizdən pavilyonlar deyil, dayanacaq nişanı qoyulub”, – deyə qurumdan açıqlama verilib.
