Bakının Sabunçu rayonu, Ramana qəsəbəsi, 2-ci döngə adlanan yaşayış massivi çirkaba qərq olub. Bu haqda bu gün, 8 mart tarixində Bakuplus.az Real TV-yə istinadən xəbər verir.
Sakinlərin sözlərinə görə, sözügedən ərazidə çirkab ətrafa axaraq kəskin qoxu yayır və evlərə daşır. İnsanlar şambolar qazsalar da, bu, problemi həll etmir. Torpağa hopan qrunt suları daim üzə çıxır və üfunət ətrafı bürüyür.
“Evlərin zirzəmilərini də su basır. Yayda ilanlardan və ağcaqanadlardan əziyyət çəkirik”, – deyə sakinlər şikayət edirlər.
Onlar öz hesablarına su xətti çəksələr də, kifayət olmur. Su maşınlarla gətirdilir, eləcə də kanalizasiyanı maşınlar çəkdirir.
Buna baxmayaraq, ətraf küçələrdə həm su, həm də kanalizasiya xətti mövcuddur.
“Biz bu məsələ ilə bağlı qurumlara müraciət etmişik, amma köməyi yoxdur. “Azərsu”dan bizə deyilir ki, layihəyə düşəcək, amma artıq 6 il keçib”, – deyə sakinlər qeyd ediblər.
Əlavə olaraq, sakinlər yolsuzluqdan da əziyyət çəkirlər. Onların sözlərinə görə, 5 kilometrlik yol heç vaxt asfaltlanmayıb. Bu səbəbdən vətəndaşlar yola özləri daşlar düzüblər.
“Azərsu” ASC-dən bildirilib ki, baş plana əsasən, gələcəkdə həmin ərazilərdə mərhələli şəkildə həm mərkəzləşdirilmiş içməli su, həm də kanalizasiya sisteminin yaradılması planlaşdırılır.
Sabunçu Rayon İcra Hakimiyyətindən (RİH) isə qeyd olundu ki, yollarla bağlı aidiyyəti üzrə məktub artıq göndərilib.
