Yasamal rayonu Abbas Mirzə Şərifzadə küçəsindəki ərazidə bir vaxtlar bağca fəaliyyət göstərib. Daha sonra ərazi sahibkar tərəfindən alınıb və bina sökülüb. Nəticədə böyük bir sahə baxımsızlığa məruz qaldığından zibil poliqonuna çevrilib. Problemin daha acınacaqlı tərəfi isə ondan ibarətdir ki, ərazidə yaşayan yüzlərlə ailə üfunətə məruz qalır. Bu haqda bu gün, 15 iyul tarixində Bakuplus.az ATV-yə istinadən məlumat verir.
Ərazidə yaşayan sakinlər deyirlər ki, ərazidə illərdir ki, təmizlik işləri aparılmayıb. Dəfələrlə aidiyyəti qurumlara müraciət edilsə də, torpağın hansısa sahibkara məxsus olduğu bildirilib və bu səbəbdən heç bir tədbir görülməyib. İndi bu ərazi həm də narkomanların məkanına çevrilib.
“Bir neçə dəfə müvafiq qurumlara müraciət etmişik. Cavab olaraq deyilir ki, bura özəl ərazidir və buranın sahibi var. Amma sahibi, eşitdiyimizə görə, hal-hazırda cəzaçəkmə mərkəzindədir. Deyilir ki, çəpərlənəcək, yenilənəcək. Çəpər oldu, içərisi necə olacaq? Yay aylarında, xüsusən də bu iy çox pis olur”, – şikayətçilərin biri dedi.
Yasamal Rayon Mənzil Kommunal Təsərrüfatı Birliyindən bildirildi ki, ərazi gün ərzində tullantılardan təmizlənəcək. O ki qaldı problemin birdəfəlik həllinə və ya ərazidə parkın salınmasına verilən cavab fərqli olmadı. Qeyd olundu ki, ərazi özəl mülkiyyət olduğu üçün hər hansı bir tədbirin görülməsi mümkün deyil.
