Bakıda ərini qətlə yetirməkdə təqsirləndirilən Əfsanə Qalabəylinin məhkəməsi davam edir. Bu haqda bu gün, 19 yanvar tarixində APA-ya istinadən Bakuplus.az məlumat verir.
Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən iclasda Əfsanə Qələbəyli ifadə verib. O, idmançı olan ərini uzun illər davam edən psixoloji və fiziki işgəncələrdən bezdiyi üçün öldürdüyünü bildirib.
"Məni döyüb-söyməyi bir yana, evə pozğun qadınlar gətirirdi. Bəzən evə gəlməmişdən əvvəl mənə deyirdi ki, hazırlıq gör, qonağım olacaq. Adam gətirib uşaqları, məni bir otağa salırdı və ağzımızı bağlayırdı. Etiraz edəndə isə döyürdü. Birgə nikahdan üçü oğlan biri qız olmaqla dörd övladımız var. Hadisə günü də evə adam gətirmişdi. Dedim: “Bəsdir, ayıbdır”. Dedi: "Yaxşı eləyirəm". Dözə bilməyib öldürdüm", - deyə qadın bildirib.
Proses zamanı onun azyaşlı oğlu da dindirilib. O, anasının sözlərini təsdiqləyərək atasının ailə ilə pis davrandığını, evdə mübahisə etdiyini bildirib.
Qətlə yetirilən Nurani Qələbəylinin atası mərhumun hüquqi varisi kimi tanınıb. Məhkəmədə o, gəlinindən şikayətçi olmadığını bildirib.
Sentyabrın 2-si saat 12:00 radələrində 35 yaşlı Əfsanə Qalabəyli şəxsi münasibətlər zəminində aralarında yaranan münaqişə zamanı əri, 48 yaşlı Nurani Qalabəylini bıçaqla çoxsaylı xəsarətlər yetirərək öldürüb. Nurani Qalabəyli “Sərhədçi” idman kompleksində kikboksinq üzrə məşqçi vəzifəsində çalışırdı. Onların 4 övladı var.
Faktla bağlı Xətai Rayon Prokurorluğunda Cinayət Məcəlləsinin 120.1-ci (Qəsdən adam öldürmə) maddəsi ilə cinayət işi başlanıb.
