Bakının Səbail rayonu, 3-cü massivin ərazisində yerləşən zibil poliqonu naməlum şəxslər tərəfindən hər gün yandırılır. Sakinlər deyirlər ki, çöldə tüstüdən göz gözü görmür. İnsanlar qapı-pəncərələri bağlı saxlayır, tüstüdən əziyyət çəkirlər. Bu haqda bu gün, 8 iyul tarixində Bakuplus.az ATV-yə istinadən məlumat verir.
3-cü massiv ərazisində xəstəlik mənbəyi olan zibil poliqonunun ətrafında yüzlərlə ailə məskunlaşıb və mütəmadi olaraq onlar yandırılan zibilin tüstüsünə və antisanitariya vəziyyətinə dözmək məcburiyyətinə qalırlar.
Sakinlər deyirlər ki, son bir ildə zibillərin ətrafa atılması və yandırılması halları daha da artıb. Tullantılar, əsasən, gecə saatlarında yandırıldığı üçün təhlükəli vəziyyətə yol açan şəxslərin kimliyi hələ də naməlum olaraq qalır.
Problemlə bağlı Səbail rayon bələdiyyəsindən bildirildi ki, hər üç aydan bir qurumun əməkdaşları tərəfindən ərazi texnikalarla tullantılardan təmizlənir. Ərazidə olan qutular isə kifayət etmir. Əsasən, tikinti işlərini həyata keçirən sakinlər istifadəyə yararsız tikinti materiallarını ərazidəki boşluqlara atırlar. Bununla bağlı sakinlərə dəfələrlə xəbərdarlıq edilsə də, vəziyyət dəyişməz olaraq qalır. Kimsə ərazini yenidən zibilləyir, kimsə də yandırır.
O da qeyd olundu ki, yaxın günlərdə ərazidə yenidən təmizlik işləri görüləcək və tullantı qutularının sayı artırılacaq. Problemin köklü həllinə gəlincə Səbail rayon bələdiyyəsindən bildirildi ki, bu, onların imkanları xaricindədir.
