Yay ayları olmasına baxmayaraq, sərnişinlər marşrut avtobuslarının az olduğunu, 30-40 dəqiqə intervalla gəldiyini, bu səbəbdən də dayanacaqda insanların sayının çoxaldığını, nəticədə də avtobusda sıxlıq yarandığını deyirlər. Bu haqda bu gün, 12 iyul tarixində Bakuplus.az Bizim.Media-ya istinadən məlumat verir.
Belə ki, “BakuBus” MMC-yə məxsus, Beynəlxalq Avtovağzaldan Nərimanov rayonu marşrut xətti üzrə hərəkət edən 2 nömrəli marşrut avtobusunda kondisionerlər quraşdırılsa da, sərnişin çoxluğundan, istidən ayaq üstə yol getmək dözülməz olur.
“İyunun 30-dan gediş qiymətləri qalxsa da, nəqliyyatın keyfiyyəti eyni qalır. Payızda vəziyyət bundan da pis olacaq”, – deyə sərnişinlər şikayətlənirlər.
Azərbaycan Yerüstü Nəqliyyat Agentliyindən (AYNA) iddiaları inkar ediblər. AYNA nümayəndəsinin sözlərinə görə, sözügedən avtobus qrafiklə işləyir: “2 nömrəli marşrutda sərnişin tələbatına uyğun olaraq, mütəmadi 20 ədəd avtobus 6-7 dəqiqə hərəkət intervalı ilə fəaliyyət göstərir. Lakin şəhərin müəyyən yollarında yaranan nəqliyyat sıxlığı intervalın artmasına səbəb olur”.
