Azərbaycanda müəllimlərin sertifikatlaşdırılması prosesi çərçivəsində iyunun 21, 22 və 24-də test imtahanları keçiriləcək. Bu barədə bu gün, 20 iyun tarixində Bakuplus.az Elm və Təhsil Nazirliyinə istinadən məlumat verir.
İmtahanlar prosesə ilk dəfə qoşulan müəllimlər üçün nəzərdə tutulub.
Bu il attestasiya riyaziyyat, Azərbaycan dili, ingilis dili, rus dili (Azərbaycan bölməsi), rus dili və ədəbiyyatı (rus bölməsi), alman və fransız dilləri müəllimlərini əhatə edəcək.
Sertifikat əldə edən müəllimlər növbəti beş il ərzində tədrisi davam etdirmək üçün vəsiqə qazanacaqlar. 60 yaşdan yuxarı müəllimlərin imtahanda iştirakları könüllülük əsasında təşkil olunur. Bu il prosesdə 30 mindən çox müəllimin iştirakı gözlənilir.
Ötən il müəllimlərin attestasiyasında 29.951 müəllim iştirak edib. Onlardan attestasiyadan keçən 5246 müəllimin əməkhaqqı 35 faiz, 17.914 müəllimin maaşı isə 10 faiz artırılıb.
