Sabunçu rayonunda sudan qanunsuz istifadə halları aşkarlanıb. Bu haqda bu gün, 10 iyun tarixində Bakuplus.az “Azərsu”ya istinadən xəbər verir.
Keçirilən yoxlamalar zamanı rayonun bir sıra ərazilərində sudan qanunsuz istifadə olunduğu məlum olub.
Maştağa qəsəbəsi, Bağlar massivində fərdi evlərin tikintisi ilə məşğul olan şəxslər tərəfindən tikilmiş 40-a yaxın həyət evində içməli sudan qanunsuz istifadə edildiyi aşkarlanıb. Sudan qanunsuz istifadəyə görə evlərin su təchizatı dayandırılsa da, ev sahibləri kəsilən su xəttini birləşdirərək sudan qanunsuz istifadəni davam etdiriblər.
Ramana qəsəbəsi, 2-ci sahə adlanan ərazidə yerləşən istixanada da suyun talandığı məlum olub. Burada istixananın sahibi əlavə boru vasitəsilə yaxınlıqdan keçən magistral xəttə birləşmə edərək suyu talayıb.
Bilgəh qəsəbəsi, Salamzadə küçəsində yerləşən avtoyuma məntəqəsi və servis mərkəzi texniki şərt almadan, müqavilə bağlamadan sudan qanunsuz istifadə edib.
Aşkar olunan bütün qanunsuz birləşmələr ləğv edilib. Obyekt və mənzil sahibləri məsuliyyətə cəlb olunublar.
Cari ili yanvar-may aylarında Sabunçu rayonu üzrə 2053 sudan qanunsuz istifadə faktı aşkarlanıb, 50-dən çox fakt araşdırılması üçün hüquq-mühafizə orqanlarına təqdim olunub.
[caption id="attachment_103131" align="alignnone" width="640"]
Foto Azersu.az[/caption]
