Paytaxtın Sabunçu vağzalı adlanan ərazisində, Ə.Məmmədəliyev küçəsində hər gün tıxac müşahidə olunur. Bildirilir ki, sıxlığın səbəb əks yola çıxan və nəticədə tıxac yaradan sürücülərdir. Bu haqda bu gün, 11 oktyabr tarixində Bakuplus.az Baku.ws-ə istinadən məlumat verir.
Bakı şəhər DYPİ-nin əməkdaşı, polis mayoru Araz Əsgərlinin sözlərinə görə, günün pik saatlarında tələsən sürücülərin davranışı yolverilməzdir. Əsgərli qeyd edib ki, bu, inzibati məsuliyyət yaradan hal olmaqla yanaşı, həmin yollardan istifadə edən piyadaların hərəkəti üçün də ciddi təhlükə yaradır.
“İnzibati tənbeh tədbirlərinin seçilməsindən asılı olmayaraq, hər bir sürücü, piyada, hərəkətin ümumilikdə bütün iştirakçıları yol hərəkəti qaydalarına həyati əhəmiyyətli olduğu üçün ciddi şəkildə riayət etməlidirlər. Nəzərə almaq lazımdır ki, bəzən "bilmirdim", "tələsirdim" və "getdiyim yerə gecikirəm" kimi ifadələr insanları məsuliyyətdən, eyni zamanda baş vermiş ağır yol-nəqliyyat hadisələrinin bədbəxt sonluqlarından xilas etmir”, – deyə Əsgərli vurğulayıb.
Sabunçu rayon Dövlət Yol Polisi İdarəsinin əməkdaşları tərəfindən həmin ərazini ciddi nəzarətə götürülməklə müvafiq tədbirlərin həyata keçirilməsi üçün xüsusi göstəriş verilib.
