Sabunçuda istehsalat sexinin fəaliyyəti dayandırılıb - VİDEO
Sabunçu rayonu, Nəriman Nərimanov küçəsi, 1 ünvanında yerləşən sexdə nöqsanlar aşkarlanıb. Bu haqda bu gün, 4 mart tarixində Bakuplus.az Fövqəladə Hallar Nazirliyinə istinadən xəbər verir.
“Az Metal İndustry Company” MMC-yə məxsus istehsalat sexində keçirilən yoxlama zamanı yanğın təhlükəsizliyi sahəsində qayda pozuntuları olduğu məlum olub.
Aşkar olunan nöqsanlar aşağıdakı kimidir:
Obyektdə avtomatik yanğınxəbərverici siqnalizasiya qurğuları və daxili yanğın su kranları quraşdırılmayıb;
Obyektdə propan tipli qaz balonlarından və standartlara uyğun olmayan qızdırıcı sobadan istifadə olunur;
İzolyasiya örtüyü zədəli və nasaz elektrik avadanlıqlarından istifadə edilməklə, elektrik avadanlıqları artıq yükləmədən və qısaqapanmadan mühafizə olunması üçün qoruyucu aparatlarla təmin edilməyib;
Elektrik təsərrüfatı qaydaların tələblərinə uyğun quraşdırılmayıb və elektrik təsərrüfatına profilaktik baxış keçirilməyib;
Obyekt ilkin yanğınsöndürmə vasitələri ilə təmin olunmayıb və mövcud odsöndürən balonların tərkibi yenilənməyib.
Adıçəkilən nöqsanlar nəzərə alınaraq istehsalat sexinin fəaliyyəti dayandırılıb, sahibkar məsuliyyətə cəlb olunub.
