Sabunçu rayonunda sudan qanunsuz istifadə halı aşkarlanıb. Bu haqda bu gün, 27 iyul tarixində Bakuplus.az “Azərsu”ya istinadən xəbər verir.
Məmmədli kəndi, “Südçülük sovxozu” adlanan ərazidə tikinti ilə məşğul olan sahibkarlar tikilməkdə olan həyət evlərini su ilə təmin etmək üçün müqavilə bağlamadan boru vasitəsilə qeyri-qanuni su xətti çəkdiriblər. Bundan əlavə, onlar 4 ədəd paylayıcı kollektor quraşdıraraq tikilməkdə olan evlərə də su qoşublar.
Eyni hal yaxınlıqda yerləşən ət kəsimi məntəqəsində də aşkar edilib.
Sözügedən faktlarla bağlı qanunsuz xətlər ləğv edilib, sahibkarlar məsuliyyətə cəlb olunublar. Yoxlamalar davam edir.
Cari ilin yanvar-iyun aylarında Sabunçu rayonu üzrə 2471 sudan qanunsuz istifadə halları aşkarlanıb, 100-ə yaxın fakt araşdırılması üçün hüquq-mühafizə orqanlarına təqdim edilib.
