Sabunçu rayonu, Səmədbəy Mehmandarov küçəsi, 40 ünvanında yerləşən binalardan birinin blokuna üfunətdən daxil olmaq mümkün deyil. Zibil qoxusu təkcə bloku deyil, evləri də bürüyüb. Bu haqda bu gün, 19 iyun tarixində Bakuplus.az ATV-yə istinadən məlumat verir.
Qoxuya səbəb tullantıların zirzəmiyə atılmasıdır. Üfunətdən bir dəqiqə belə binanın blokunda dayanmaq mümkünsüzdür. Ərazidə antisanitariya vəziyyəti hökm sürür. Sakinlər deyirlər ki, cəmi bir neçə metr məsafədə tullantı qutuları olsa da, əlinə zibil keçən zirzəmiyə atır. Nəticədə isti yay aylarında vəziyyət daha acınacaqlı olur.
Sabunçu rayonu 44 saylı mənzil kommunal istismar sahəsindən bildirildi ki, binada mütəmadi olaraq təmizlik işləri aparılır. Sakinlərə təmizliyə riayət olunması ilə bağlı dəfələrlə xəbərdarlıq edilsə də, bir nəticə yoxdur.
“Bəzi məsuliyyətsiz sakinlər tullantıları binanın zirzəmisinə atmaq vərdişindən əl çəkmirlər. Buna baxmayaraq, zirzəmi yenə tullantılardan təmizlənəcək. Təmiz qalıb-qalmayacağı isə sakinlərdən asılıdır”, – deyə sahənin rəsmisi bildirib.
