Bakının Sabunçu rayonu, Maştağa qəsəbəsi, B.Bağırov küçəsi, döngə 1 ünvanında at ətinin satışı aşkar olunub. Bu haqda bu gün, 5 oktyabr tarixində Bakuplus.az Azərbaycan Qida Təhlükəsizliyi Agentliyinə (AQTA) istinadən xəbər verir.
Vətəndaşlardan daxil olan müraciətə əsasən, AQTA-nın əməkdaşları tərəfindən ərazidə plandankənar yoxlama keçirilib.
Reyd zamanı yararsız 40 kiloqram ət aşkar olunub. Həmçinin ərazidə yerləşən ət satışı məntəqəsi qida təhlükəsizliyi qeydiyyatından keçmədən fəaliyyət göstərib. Bundan əlavə, məntəqədə qida təhlükəsizliyi sahəsində qanunvericiliyin tələbləri, baytarlıq-sanitariya və sanitariya-gigiyena qaydaları pozulub.
Daha sonra ət laborotoriya ekspertizalarından keçirilib və ətlərdə at DNT-si və bakterioloji çirklənmə olduğu müəyyən edilib.
At ətinin satışa çıxarılmasının və dövriyyəyə buraxılmasının qarşısı alınıb. Həmçinin müəssisənin fəaliyyəti dayandırılıb və sahibkar inzibati məsuliyyətə cəlb olunub.
