Bakı şəhəri, Səbail rayonu, Nizami küçəsi, 66 ünvanında yerləşən evin sakinləri yaşayış binasının birinci mərtəbəsində yerləşən “The Garden” restoranının fəaliyyətindən narazıdırlar. Bu haqda bu gün, 28 yanvar tarixində Bakuplus.az Oxu.az-a istinadən məlumat verir.
“Binada 86 mənzil var. Hər birinin sakinləri şikayətçidirlər. Restoran dörd aydır ki, fəaliyyət göstərir. Restoranda təqdim olunan qəlyan, samovar çayı və kababın tüstüsündən dayana bilmirik. Evdə onkoloji xəstəm var. Qəlyanı onun otağının altında hazırlayırlar. Qoxudan nəfəs ala bilmir. Səhərə qədər yatmıram. Pəncərələri açıram ki, nəfəs ala bilsin. Blokda, məhəllədə qoxudan dayanmaq olmur.
İki dəfə restorana akt tərtib olunub, protokol yazıblar. Dörd dəfə atmosferin çirklənməsi halı qeydə alınıb. Lakin faydası yoxdur. Yenə də fəaliyyət göstərir”, – deyə bina sakini Mahirə Aşumova qeyd edib.
O bildirib ki, iaşə obyektindən çıxan tüstü və müxtəlif qoxular vətəndaşlarda ciddi narahatlıq yaradır.
Dövlət Ekoloji Təhlükəsizlik Xidmətindən bildirilib ki, məsələ ilə bağlı araşdırma aparılıb, atmosfer havasına atılan tullantıların miqdarının normadan artıq olduğu məlum olub. Nəticədə restoran sahibi Rəşad Sultanov barəsində inzibati xəta protokolu tərtib olunub. Nöqsanların qısa müddətdə aradan qaldırılması ilə bağlı ciddi xəbərdarlıq olunub. Aşkar olunan nöqsanlar aradan qaldırılmadığı halda restoranın fəaliyyətinin dayandırılması istiqamətində addımların atılacağı restoran rəhbərliyinə bildirilib.
