Bakıda sakinlər tikinti şirkətindən ƏDV ala bilməyiblər. Bu haqda bu gün, 1 dekabr tarixində Bakuplus.az Baku TV-yə istinadən xəbər verir.
Şikayətçilərin sözlərinə görə, onlar MTK-dan mənzil aldıqlarını, ancaq həmin evdən ƏDV götürə bilmədiklərini deyirlər.
“Mənzili aldığım gündən satış meneceri ilə əlaqə saxlamışam. Dedilər ki, sizə xəbər edəcəyik. Mənə bu iş üzrə danışıqlar getdiyi, Vergilər Nazirliyi ilə işlərin aparıldığı deyilib. Nəticədə təxminən 5 ay sonra bu işlə bağlı yenidən müraciət etdikdə satış ofisindən mənə deyildi ki, 90 günlük müddət ötüb və mənə ödəniş düşmür. Söhbət 6700 AZN puldan gedir”, – deyə şikayətçi bildirir.
Şirkətdən isə məsələ ilə bağlı bildirilib ki, alıcılar 90 gündən gec olmayaraq özləri portaldan qeydiyyatdan keçməli, müvafiq sənədləri göndərməli idilər. Dövlət Vergi Xidmətindən isə qeyd edilib ki, problemlə bağlı edilən müraciət araşdırılır və qısa müddətdə cavablandırılacaq.
