Xətai rayonunda yerləşən “Qadın həbsxanası” adı ilə tanınan ərazidə gecə saatlarında qazıntı işləri aparılır.
Bakuplus.az-a müraciət edən sakinlər deyir ki, səs-küydən səhərə kimi yatmaq mümkün olmur.
Şikayətçilərin redaksiyamıza göndərdikləri görüntülərin gecə 03:00-04:00 radələrində çəkildiyi deyilir.
“Havalar istidir deyə pəncərələri açıq qoymaq məcburiyyətində qalırıq. Onda da səsə görə yatmaq mümkün olmur. İnsanlar səhər işə gedir, yaşlılar, xəstələr var. Artıq əsəblərimiz tab gətirmir”, - deyə sakinlərdən biri bildirib.
Narazı vətəndaşlar səlahiyyətli qurumlardan məsələyə müdaxilə etməyi, gecə saatlarında bu cür səs-küylü işlərin dayandırılmasını tələb edirlər.
Qeyd edək ki, “İnzibati Xətalar Məcəlləsi”nin 244-cü maddəsinə əsasən, gecə saatlarında (23:00-dan 07:00-dək) insanların istirahətinə mane olan səs-küy qanun pozuntusu hesab olunur.
