Kliniki Tibbi Mərkəzdə (Semaşko) əkizlərə hamilə olan qadına qeysəriyyə əməliyyatından sonra yalnız bir uşağı veriblər. Bu haqda bu gün, 16 iyul tarixində Bakuplus.az APA TV-yə istinadən məlumat verir.
Anası Mədinə Hacıyevanın sözlərinə görə, hamiləlik zamanı dəfələrlə dopler və ultrasəs müayinələrindən (USM) keçib və həkimlər əkiz uşaqlar olacağını bildiriblər.
Yanvarın 26-da qadın KTM-ə gətirilib. Orada ona uşaqlardan birinin zəif olduğunu, doğuşdan sonra övladlardan birinin öldüyünü bildiriblər. Hacıyeva xəstəxananın həkimləri – Solmaz Mehdiyeva və ultrasəs aparatında çalışan müayinə həkimi Zeynəb Osmanovanın da onun əkiz uşaqlara hamilə olduğunu təsdiqlədiklərini bildirib.
O, həkim Solmaz Mehdiyeva ilə birgə yanvarın 30-da qeysəriyyə əməliyyatı ilə doğuş etməyi planlaşdırsa da, Mədinə Hacıyeva ağrılar səbəbindən yanvarın 26-da xəstəxanaya aparılıb və əməliyyat həmin gün növbətçi olan Minnurə Kazımova tərəfindən həyata keçirilib.
Qadın itirdiyi övladının 3 kiloqram 100 qram çəkidə olduğunu deyir. Ona verilən övladı isə həkimlərin zəif diaqnozu qoyduqları körpədir.
Ailə KTM-in direktoru Könül Ələkbərovla da görüşüb, Nəsimi Rayon Prokurorluğuna da müraciət edib. Mədinə Hacıyevanı müayinə edən həkim Zeynəb Osmanova isə ona pul və ərizəsini geri götürməsini təklif edib.
Daxil olan şikayətə baxmayaraq, Nəsimi Rayon Prokurorluğunda aparılan araşdırmalardan sonra cinayət işi başlanılmasının rədd edilməsi barədə qərar qəbul edilib.
