Bakının Xətai rayonunda “Sevirəm” parkının genişləndirilməsi işlərinə başlanılıb. Bu haqda bu gün, 29 iyun tarixində Bakuplus.az Xəzər Xəbər-ə istinadən məlumat verir.
Xətai Rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanovun sözlərinə görə, Kamandar Əhmədov, Həmid Abbasbəyli, Yusif Səfərov və Sergey Senyuşkin küçələrində qəzalı vəziyyətdə olan evlər sökülür. Sakinlərlə müqavilə bağlanılır, vəsaitlər ödənilir.
Söküntü işləri tam yekunlaşdıqdan sonra burada müxtəlif növ ağaclar əkiləcək və yeni yaşıllıq zonası yaradılacaq. Ərazi sakinlərin istirahəti üçün əlverişli məkanlardan birinə çevriləcək.
Bir müddət əvvəl Bakı Şəhər İcra Hakimiyyəti paytaxtda aparılan geniş tikinti-quruculuq işləri çərçivəsində bir çox yerlərdə istismar müddəti bitmiş, qəzalı bina və tikililərin əvəzinə yeni bina və obyektlər deyil, məhz parklar salındığını açıqlamışdı.
“Sevirəm” park kompleksi 2016-ci ildə salınıb. 3,2 hektar ərazidə salınan parkda 4 mindən artıq müxtəlif növ ağac, o cümlədən 30 illik eldar şamı, 35 illik sərv, 12 illik tuya ağacları əkilib.
