Bakıda sərnişinlər 49 saylı marşrut xətti üzrə hərəkət edən avtobusun sürücüsündən şikayət edirlər. Müvafiq video sosial şəbəkələrdə yayılıb. Bu haqda bu gün, 3 iyul tarixində Bakuplus.az Avtosfer-ə istinadən məlumat verir.
Vətəndaşlardan birinin sözlərinə görə, gediş haqqı artırılsa da, avtobusda komfortlu şərait yoxdur. Xüsusilə insanlar kondisionerlərin işləməməsindən və salonda havasızlıqdan şikayətlənirlər.
“AzlandPlaza” daşıyıcı şirkətinin rəhbəri Bəhruz Tağıyev bildirib ki, adıçəkilən marşrut xətti üzrə avtobuslarda kondisioner sistemlərinin nasazlığı ilə bağlı deyilənlər əsassızdır.
"Avtobuslarımız "Avro-5" standartlarına cavab verir. Kondisioner sistemi də işlək vəziyyətdədir. Əgər hər hansı bir nasazlıq olsa, nəqliyyat vasitəsinə dərhal baxış keçirilir və texniki problem aradan qaldırılır. Nəzərə almaq lazımdır ki, havalar həddən artıq isti keçir. Sərnişinlər arasında isə yaşlılar, səhhətində problem olanlar var. Avtobuslar hər 500 metrdən bir qoyulan müvafiq dayanacaqlarda dayanır, qapılar açılır. Elə sərnişin var ki, avtobus çox soyuq olduğu üçün kondisionerin söndürülməsini xahiş edir. Elə sərnişinlər də var, isti üzündən kondisionerin yandırılmasını istəyir.
Sürücü də hər bir halda sərnişinlərin xahişini mümkün qədər nəzərə almağa çalışır. Görüntülərdə pəncərənin açıq olduğu görünür. Bəzən sərnişinlər pəncərəni açır, düşən zaman isə bağlamırlar. Sürücü də fiziki olaraq hər sərnişin düşdükdən sonra pəncərələrin açıq olub-olmadığını yoxlaya bilməz. Pəncərələr açıq olduğu zaman kondisionerə də güc düşür, işləsə belə, sərnişinlər işləmədiyini deyirlər. Ona görə bəzən bu cür anlaşılmazlıqdan dolayı belə görüntülər ortaya çıxır. İstəsəniz, istənilən avtobusumuza minib gün ərzində çəkiliş edib, kondisionerlərdə problem var, yoxsa yox, özünüz yoxlaya bilərsiniz".
