Sabunçu rayonu, Maştağa qəsəbəsi, Sultan Əliyev küçəsinin düz mərkəzində antisanitar şərait illərdir, davam edir. Bu haqda bu gün, 21 iyun tarixində Bakuplus.az Real TV-yə istinadən məlumat verir.
Sakinlər deyirlər ki, məişət tullantıları mütəmadi təmizlənir. Amma bura digər ərazilərdən də zibil atıldığından tullantıların gündə 2 dəfə daşınması kifayət etmir. Vəziyyət nəzərə alınaraq, daşınmanı daha tez-tez etmək və ya digər alternativ variantlar düşünmək lazımdır, çünki qoxu ilə yanaşı, zibillik əraziyə gəmiriciləri cəlb edir.
Sabunçu RİH başçısının Maştağa inzibati dairəsi üzrə nümayəndəliyindən bildirildi ki, antisanitar şəraitə görə sözügedən ünvan daimi nəzarətdədir və ərazidəki məişət tullantıları hər gün olduğu kimi, bu gün də təmizlənib. Hətta bugünkü təmizliyi əks etdirən foto da göndərildi.
“Sözügedən ünvanda məişət tullantıları qutularının ətrafında antisanitariya vəziyyətinin yaranması vətəndaşların onlardan təyinatı üzrə istifadə etməmələri ilə bağlıdır. Belə ki, bəzən vətəndaşlar məişət tullanıtları üçün ayrılan qutulara təyinatı üzrə aid olmayan digər tullantılar əlavə edirlər. Lakin buna baxmayaraq, ərazi Sabunçu rayon mənzil kommunal təsərrüfat birliyi tərəfindən təmizlənmişdir”, – İcra Hakimiyyətinin rəsmisi deyib.
Məsələ ilə bağlı Sabunçu rayon mənzil kommunal təsərrüfat birliyindən əlavə olunub ki, məişət tullantılarının atılması üçün nəzərdə tutulan konteynerlərin sayını artırmaq mümkün deyil. Çünki onların yerləşdiyi sahədə hər 2 tərəf yolla məhdudlaşır. Lakin buna baxmayaraq, ərazidə nəzarət daha da gücləndirəcək.
