Suraxanı rayonunun Səttar Bəhlulzadə küçəsi, döngə 17-də yaşayanların evləri illərdir ki, qrunt sularına qərq olub və yay-qış artmaqda davam edir. Bu haqda bu gün, 29 aprel tarixində Bakuplus.az ARB Xəbər-ə istinadən məlumat verir.
Ərazidə acınacaqlı vəziyyət artıq 5 ildir davam edir. Sakinlər deyirlər ki, hər il evlərdə təmir işləri aparsalar da, qrunt sularının qarşısını heç bir şəkildə ala bilmirlər. Problem 18 evin hər birində yaşanır.
Sakinlər bu illər ərzində dəfələrlə Suraxanı Rayon İcra Hakimiyyətinə (RİH) müraciət etdiklərini deyiblər. Hətta FHN tərəfindən bu evlərin sökülməsi ilə bağlı rəy də verilib. Amma hələ ki icrası baş tutmayıb. RİH-nin verdiyi cavab isə yalnız 6 evə aid oldu.
Suraxanı rayon 74 saylı Mənzil Kommunal İstismar Sahəsinin (MKİS) rəisi Seyidkazım Bağırovun sözlərinə görə, heç bir mülkiyyət sənədi olmayan 6 fərdi yaşayış evi vaxtı ilə sakinlər tərəfindən tikilib. Hal-hazırda həmin evlər qəzalı vəziyyətdədir. MKİS tərəfindən FHN-nə edilən müraciət əsasında həmin mənzillərə baxış keçirilib, onların, həqiqətən, qəzalı olması müəyyən edilib və müvafiq akt tərtib edilib. Qurum tərəfindən qərara uyğun tədbirlər görüləcəkdir.
