Suraxanı rayonunda sudan qanunsuz istifadəyə qarşı yoxlamalar keçirilib. Bu haqda bu gün, 18 aprel tarixində Bakuplus.az “Azərsu”ya istinadən xəbər verir.
Yeni Suraxanı qəsəbəsi, 14 iyul küçəsində yeni tikilmiş apartament tipli binanın su təchizatı sisteminə qoşulmaq üçün texniki şərti və layihəsi var. Buna baxmayaraq, binanın əsas su xəttini başqa istiqamətdən özbaşına şəbəkəyə müdaxilə etməklə birləşdirib.
Hövsan qəsəbəsi, Rasim Şahsuvarov küçəsində bir sahibkara məxsus market, aptek, zoomağaza və ət satışı obyektlərinin sahibi texniki şərt almadan və müqavilə bağlamadan şəbəkəyə qanunsuz olaraq qoşulub.
Hövsan–Türkan yolu üzərində yerləşən marketdə də su təchizatı qanunsuz çəkilmiş xətt vasitəsilə aparılıb.
Bülbülə qəsəbəsində yeni inşa olunan mebel sexinin sahibi texniki şərt almadan və müqavilə bağlamadan obyektin su xəttini özbaşına şəbəkəyə qoşub.
Aşkar edilən bütün qeyri-qanuni xətt və birləşmələr kəsilərək ləğv edilib.
Cari ilin birinci rübündə içməli sudan qeyri-qanuni istifadə ilə bağlı Suraxanı rayonunda 76, ümumilikdə isə 1250 fakt aşkarlanıb.
