Bakının Suraxanı rayonu, Yeni Bahar qəsəbəsində yanğın hidrantı açıq qalıb. Nəticədə ətrafdakı ərazini su basıb. Bu haqda bu gün, 6 mart tarixində Oxu.az məlumat verib.
Sakinlər bildirirlər ki, qəsəbədə 3 gündür ki, su yoxdur. “Qəsəbənin suyu haraya axır? Heç kimin də vecinə deyil. Qəsəbədə hidranta müdaxilə edilib, su boşuna axıb”, - şikayətçilər əlavə edirlər.
“Azərsu” ASC-nin rəsmisi Anar Cəbrayıllının sözlərinə görə, açıla hidrant artıq bağlanıb.
“Hidrantlar hər iki tərəfdən qapaqla bağlanır və özbaşına müdaxilə yolverilməzdir. Ona Fövqəladə Hallar Nazirliyi və “Azərsu” ASC-nin işçiləri müdaxilə edə bilərlər. Oradan, çox güman ki, su götürmək üçün vətəndaşlar və yaxud da sudaşıyan maşınların əməkdaşları hidrantı açıblar. Nəticədə belə açıq qalıb. Təəssüf ki, ətrafda sudaşıyan maşınlar pul ödəməmək üçün hidrantlara müdaxilə edirlər. Suraxanı Rayon Polis İdarəsinə bu cür halların qarşısını almaq üçün müraciət edilib”, - deyə A.Cəbrayıllı əlavə edib.
