Paytaxtın Suraxanı rayonu, Zığ yolu küçəsi, 93 ünvanında yaşayan sakinlər kommunal problemlərlə hər gün üzləşirlər. Bu haqda bu gün, 29 aprel tarixində Bakuplus.az ATV-yə istinadən məlumat verir.
Sakinlər deyirlər ki, binaya köçəndən qarşılaşmadıqları problem qalmayıb. Nə binanın təmizliyi təmin olunur, nə də təhlükəsizliyi. İndi də içməli su problemi ortaya çıxıb. Bir neçə gündür su fasilələrlə verilir. Hətta son 2 gündür içməli suya ümumiyyətlə həsrətdirlər. Məsələ ilə bağlı Azərsu ASC-yə müraciət etsələr də, qurumdan bildirilib ki, problemin onlarla əlaqəsi yoxdur.
Binanın komendantı Tofiq Hüseynov bildirdi ki, problem “Azərsu”dan qaynaqlanır. Son günlər su tamamən kəsildiyi üçün binanın 500 tonluq su ehtiyatı bitib.
“Su qıtlığını önəm gətirərək su verilməyib. Bu gün saat 8-dən su gəlməyə başlayıb. Su anbarı yarım saat ərzində dolub. İndi də hal-hazırda dolmağa davam edir. Həmin su da bu dəqiqə bütün binalarımıza paylanılır”, - komendant qeyd edib.
Azərsu ASC-nin rəsmisi Anar Cəbrayıllı açıqlama verib: “Həmin ərazidə su təchizatında heç bir problem baş verməyib. Sadəcə həmin MTK-nın əməkdaşları siyirtmələri açaraq anbarları doldurandan sonra siyirtmələri bağlayırlar. Su verilən vaxtda çox güman ki, həmin ərazidə anbarlar doldurulmayıb və buna görə MTK-nın müəyyən müddətdə su problemi yaranıb və hal-hazırda həmin MTK-ya normal qaydada su verilir.”
Binanın su ilə təminatında fasilələr hələ də davam edir. Problemin, həqiqətən, haradan qaynaqlandığını etiraf edən isə yoxdur.
