Suraxanı rayonu, Səttar Bəhlulzadə küçəsində təmir işlərinə başlanılıb. Bu haqda bu gün, 11 iyun tarixində Bakuplus.az Avtomobil Yolları Dövlət Agentliyinə istinadən xəbər verir.
İşlər adıçəkilən küçənin Heydər Əliyev prospektindən “Atəşgah məbədi” Dövlət Tarix-Memarlıq Qoruğunadək olan hissəsini əhatə edir.
Uzunluğu 4,9 km, ortalama eni 9 metr olan sözügedən küçədə hazırda köhnə və yararsız asfalt-beton örtüyünün frezlənməsi və frez materialının kənara daşınması işləri aparılır.
Təmir çərçivəsində küçə boyunca zəruri yerlərdə köhnə səki daşlarının yenilənməsi, yeraltı kommunikasiya xətlərinin baxış qapaqlarının layihə hündürlüyünə qaldırılması, zəruri olan yerlərdə yağış barmaqlıqlarının yenilənməsi işləri də yerinə yetiriləcək.
Nəqliyyat vasitələrinin hərəkəti qismən məhdudlaşdırılıb.
