Xəzər rayonu, Türkan bağları adlanan ərazidə içməli su, qaz və yol yoxdur. Bu haqda 18 iyul tarixində APA məlumat verib.
Sakinlər bildirir ki, ərazidə içməli su problemi mövcuddur. Burada su 30-40 metr dərinlikdən çıxır, özü də duzlu.
Məsələ ilə bağlı “Azərsu”ASC-dən bildirilir ki, ərazinin içməli su ilə təmin olunması üçün müəyyən vəsait tələb olunur: “Azərsu” ASC-nin Abşeron yarımadası üzrə baş planında nəzərdə tutulub ki, gələcəkdə dövlət investisiyaları hesabına həmin ərazilərdə mərkəzləşdirilmiş şəbəkə yaradılsın. Bu, dövlət tərəfindən təsdiqlənərsə, qurum həmin ərazilərdə işlərə başlayacaq".
Bundan əlavə, yaşayış massivində yollar pis vəziyyətdədir. Faktla bağlı İcra hakimiyyətinin İctimai-siyasi və humanitar məsələlər şöbəsinin müdiri Gülbala Qurbanov bildirir ki, AAYDA-nı məsələ ilə bağlı məlumatlandırıblar. Qurumun rəsmisi Anar Nəcəfli isə qeyd edib ki, sözügedən yolun indiyədək təmir olunmamasına görə AAYDA məsuliyyət daşımır.
Ərazidə yaşayanların mavi yanacaq problemi də var. "Azəriqaz"ın sözçüsü Eldəniz Vəliyev deyir ki, sözügedən ərazinin qazlaşdırılması təmsil etdiyi qurumun gündəliyindədir: “Bu, mərhələli şəkildə həyata keçirilir. Əgər sakinlər bunu gözləmək istəmirlərsə, öz vəsaitləri hesabına lisenziyası olan podratçı şirkətlərlə anlaşaraq evlərini mavi yanacaqla təmin edə bilərlər. Burada vətəndaşlar tərəfindən hər hansı bir vəsaitin istənilməsi absurd fikirdir. Lisenziyası olan podratçı şirkətlərin sakinlərdən istədiyi məbləğə və ya sövdələşməyə SOCAR “Azəriqaz” İB olaraq biz qarışmırıq. Sayğacların verilməsi qurum tərəfindən ödənişsiz olaraq həyata keçirilir”
