Taksi sürücülərinin sözlərinə görə, bəzi taksi şirkətləri yeni qaydalara əməl etmirlər. “Eləsi var ki, təzə maşınla qeydiyyatdan keçir. “BMW” gəlməli olduğu halda, “Prius” gəlir. İstifadəyə yararsız maşını buraxırlar. Hesab açırlar bir adla, başqa sürücü gəlir”, - sürücülər iddia edirlər. Bu haqda bu gün, 24 iyul tarixində Bakuplus.az Baku Tv-yə istinadən məlumat verir.
Taksi fəaliyyəti ilə məşğul olan sürücülərin sözlərinə görə, ili 15 ildən çox olan avtomobillər də taksi kimi fəaliyyət göstərir.
Taksi şirkətindən bildirilib ki, yeni tətbiq olunmuş qaydalara onlar tərəfindən riayət edilir. Şirkət isə öz növbəsində sürücülərdən də həmin qanunlara əməl etməyi tələb edir. Eyni zamanda avtomobilin istehsal tarixini və qanuni tələblərə uyğunluğunu avtomatik olaraq izləməyə imkan verən tətbiqlər təşkil edilib. Avtonəqliyyat vasitələrinin lisenziya kartlarının və sürücü hazırlığı sertifikatlarının fotoyoxlanışını həyata keçirirlər. Azərbaycan Yerüstü Nəqliyyat Agentliyinə (AYNA) gediş məlumatlarını təqdim edirlər.
AYNA-dan isə bildirildi ki, belə hallarla rastlaşan vətəndaşların 141 çağrı Mərkəzinə məlumat vermələri tövsiyə olunur.
“Sərnişinlərin qarşılaşdığı bu məsələ ilə bağlı tərəfimizdən taksi sifarişi operatorları ilə görüşlər keçirilib. Bu kimi halların qarşısını almaq üçün proqram təminatının verdiyi üstünlüklərdən istifadə edərək, primitiv tədbirlərin görülməsi ilə bağlı iş aparılır. Məsələ tərəfimizdən nəzarətdə saxlanılır. Taksi vasitəsilə sərnişindaşımalarda xidmət keyfiyyəti ilə bağlı sərnişinlərdən daxil olan müraciətlər AYNA tərəfindən araşdırılır və taksi sifarişi operatorları ilə proqram təminatının verdiyi üstünlüklərdən istifadə edilərək neqativ halların qarşısının alınması üçün tədbir görülür”, - AYNA-nın rəsmisi Tural Orucov əlavə edib.
