Tanınmış jurnalist Rasim İsmayılov “Azəristilik” ASC-dən şikayətçidir.
Bakuplus.az xəbər verir ki, o, bu barədə şəxsi sosial şəbəkə hesabında paylaşım edib.
Jurnalistin sözlərinə görə, yaşadığı binanın bir hissəsində istilik yoxdur:
“Artıq 15 gündür qış rejiminə keçilməsinə baxmayaraq bizim mənzilin bir hissəsinə istilik verilmir”.
Rasim İsmayılov bildirib ki, qurumlar məsuliyyəti öz üzərindən atır.
“Azəristilik” ASC deyir ki, bizlik deyil. Xətai rayon 75 saylı MKİS-nin rəisi deyir ki, bizlik deyil. Xətai Bələdiyyəsi ümumiyyətlə mövcuddurmu, bilmirəm. “Azəristilik", bütün yayı yatıb niyə istilik veriləndən sonra təmirlərə başlayırsınız? Xətai Bələdiyyəsi, niyə əhalidən yığılan bələdiyyə vergilərinin hara xərclənməsinin hesabatını açıqlamırsınız?”, - deyə jurnalist qeyd edib.
Həmçinin Rasim İsmayılov yaşadığı ərazinin həyətində qanunsuz obyektin tikildiyini də iddia edib:
“Xətai Rayon İcra Hakimiyyətinə isə tamam başqa sualım var. Sarayevo 13 ünvanının həyətində yerləşən 20 kvadratmetrlik dəmir qaraj bir gecənin içində necə böyüyüb 40 kvadratmetrlik obyektə çevrildi?”.
Məsələ ilə bağlı “Azəristiliktəchizat" ASC-nin mətbuat katibi Elvin Basqallı ilə əlaqə saxladıq.
Onun sözlərinə görə, həmin ünvan istiliklə təmin olunur, qazanxanalar da işləyir:
“Ünvanda istilik xətlərində də problem yoxdur. Binada istilik alır. Rasim müəllim bildirir ki, mənzilin bir tərəfində istilik yoxdur. Bu da mənzildaxili və ya binadaxili problem hesab olunur. Bu qonşularla bağlı ola bilər, istilik xəttini kimsə kəsə bilər, ventili bağlaya bilər”.
Elvin Basqallı qeyd edib ki, qazanxanalar, magistrallar və məhəllədaxili istilik xətləri “Azəristiliktəchizat" ASC-nin məsuliyyət zonasına daxildir.
“Ondan sonra yarana biləcək problemlər binanın balans saxlayıcısı və mənzil sahibləri tərəfindən həll olunmalıdır”, - deyə o əlavə edib.
Elvin Basqallı bildirib ki, biz yenə də müraciəti qeydə alırıq və Rasim müəllimin mənzilindəki probleminin dəqiq səbəbini, nədən qaynaqlandığını öyrənib, texniki dəstək göstərərik.
Bakuplus.az həmçinin binanın həyətindəki obyektlə bağlı Xətai Rayon İcra Hakimiyyətinə də sorğu ünvanlayıb.
Sorğumuza cavab olaraq bildirilib ki, ərazidəki həmin obyekt qanunidir:
“COP29-la əlaqəli olaraq biz bütün küçə boyu, məhlədaxili hər yerdə çalışırdıq ki, səliqə-sahman olsun. Bunun üçün sahibkarlara müraciət edirik. Təklif edirik ki, obyektlərini səliqəyə salsınlar. Sözügedən yer də meyvə dükanı olub. Sadəcə olaraq səliqəyə salınıb”.
