Bakının Xətai rayonu, Telnov küçəsi, 18 ünvanında sakinlər istiliyin verilməməsindən və əlavə pul alınmasından narazıdırlar. Bu haqda bu gün, 14 mart tarixində Bakuplus.az ATV News-a istinadən xəbər verir.
Vətəndaşların iddialarına görə, onların mənzillərinin kv.m sahəsini düz hesablamırlar və əlavə pul alırlar. Sakinlər bildirirlər ki, son vaxtlar təkcə radiator olan otaqlara deyil, bütün mənzilə görə pul alırlar.
Buna baxmayaraq, istilik normal verilmir və sakinlər kondisionerdən istifadə etməli olurlar.
“4 otaqdır, hər otaqda da 1 dənə qızdırıcı. Hamam, tualet, mətbəxdə radiator yoxdur, niyə o otaqlara görə pul ödəməliyik? Ayda 50-60 manat işıq pulu verirəm. Elə olur ki, 5-10 gün istilik verilmir, amma ona görə də pulumuzu alırlar”, – deyə sakinlər şikayət edirlər.
“Azəristiliktəchizat” ASC-dən bildirildi ki, 5 sentyabr 2023-cü ildə Nazirlər Kabineti tərəfindən istilik enerjisindən istifadə qaydaları təsdiqlənib. Bu sənədə əsasən, istehlakçı istifadə olunan istilik enerjisinə görə açıq eyvanlar istisna olmaqla mənzilin ümumi sahəsinə görə ödəniş etməlidir.
Həmin mənzillərdə istiliyin az gəlməsi isə binadaxili problemdir. Məsələ ilə bağlı araşdırmalar aparılır.
