Yanvarın 14-ü yeniyetmə oğlan Xətai rayonu Lütfi Zadə küçəsi, 18 ünvanında yerləşən 3 saylı uşaq evindən qaçıb. Müəssisədən verilən məlumata görə, 14 yaşlı oğlan və 16 yaşlı bacısı “Umid yeri” sığınacağından 1 ilə yaxındır ki, uşaq evinə gətiriliblər. Bacı müəssisəyə adaptasiya olsa da, Cümşüd anasızlığa öyrəşə bilmədiyi üçün bu üsula əl ataraq anasını axtarmaq üçün qaçıb. Bu haqda bu gün, 16 yanvar tarixində Bakuplus.az Xəzər Xəbər-ə istinadən məlumat verir.
“Yanvar ayın 7-də ərizə ilə uşaq bir həftəlik anasına tətilə verilmiş, 13-də isə müəssisəyə geri qaytarılmışdır. 14-ü səhər yuxudan qalxanda qrup yoldaşlarına bildirib ki, mən anamsız qala bilmirəm, anamı istəyirəm, ayaqyolu adı ilə müəssisəni tərk etmişdir”, – uşaq evinin rəhbəri Gülnarə Quliyevanın sözlərinə görə, bu, uşağın ilk belə halı deyil. O, əvvəllər nənəsi və bibisinin himayəsində olan zaman da bu üsula əl atıb. O ki qaldı uşağın bu qədər rahat müəssisədən qaça bilməsinə, bu suala müəssisədən cavab verilməyib.
Azyaşlının uşaq evini tərk etməsi ilə bağlı polisə daxil olan məlumat əsasında o, Abşeron rayonu ərazisindən tapılaraq, bölməyə gətirilib. Daha sonra isə anasına təhvil verilib. Oğlan uşaq evinə qayıtmaqdan imtina etdiyini və anasının yanında qalacağını bildirib.
Veriən məlumata görə, oğlan və bacısı bir müddət bibilərinin himayəsində olublar. İddialara görə, sonradan bibi də onlardan imtina edib.
Oğlan anası ilə qalmaq istəsə də, bacının belə bir istəyi yoxdur.
