Sosial şəbəkədə 49 saylı “İntellekt” məktəb-liseyinin ingilis dili müəllimi Könül Həsənovanın şagirdlərdən müalicə üçün pul tələb edən çıxışının audioyazısı yayılıb. Bu haqda bu gün, 14 fevral tarixində APA məlumat verib.
Verilən məlumata görə, ötən ilin dekabrında əməliyyat olunmaq üçün Türkiyəyə gedən müəllim sinif qrupuna səs yazısı göndərərək uşaqlardan pul tələb edib.
Bakı Şəhəri üzrə Təhsil İdarəsindən bildirilib ki, məsələ ilə bağlı quruma səs yazısı haqda məlumat bir neçə gün əvvəl daxil olub: “Bununla əlaqədar müvafiq araşdırma aparılıb. Araşdırmanın nəticələrinə müvafiq olaraq, görüləcək qanunauyğun tədbirlər haqqında əlavə məlumat veriləcək.
Qeyd edək ki, məktəbin fəaliyyətinə uyğun olmayan və müəllimin nüfuzuna xələl gətirən hallara qarşı qanunvericiliyin tələbləri çərçivəsində müvafiq tədbirlərin görülməsi hər zaman diqqət mərkəzində saxlanılır”.
