Xətai rayonunda, Ukrayna dairəsinin yaxınlığındakı Vunqtau küçəsində piyadalar yolu keçmək istəyirlər, sürücülər isə zolağı görmədikləri üçün yol vermək istəmirlər. Bu haqda bu gün, 11 avqust tarixində Bakuplus.az Xəzər Xəbər-ə istinadən məlumat verir.
Sözügedən ərazidə piyada keçidi işarəsi var, amma zolaq silinib. Bu isə piyadalar üçün təhlükəli vəziyyət yaradır.
“Çox təhlükəlidir. Şəxsən mənim gözümün qarşısında burada bir nəfəri maşın da vurub”, – deyə sakinlərdən biri öz narahatlığını bildirib.
Sakinlər bildirirlər ki, yolda təhlükəni artıran daha bir faktor yol kənarında dayanan avtomobillərdir. Yolu keçmək istəyən piyadaları park edilmiş nəqliyyat vasitələri arasında görmək çətin olur.
Məsələ ilə bağlı Yerüstü Nəqliyyat Agentliyindən bildirilib ki, Ukrayna dairəsi ətrafında ümumi hərəkətin yenidən təşkili ilə əlaqədar mütəxəssislər tərəfindən layihə hazırlanıb. Layihədə dairəyə daxil olan yol sahələrində piyadaların rahat və təhlükəsiz hərəkətinin təmin edilməsi nəzərdə tutulub.
