Paytaxtın Xəzər rayonu, Şüvəlan qəsəbəsində yerləşən çimərlikdə gürzə ilanlarının peyda olduğu iddia edilir. Bu haqda bu gün, 17 iyul tarixində Bakuplus.az ATV-yə istinadən məlumat verir.
Zooloq Təvəkkül İsgəndərov deyir ki, həmin ilanların gürzə olduğunu ehtimal edir. Lakin buna baxmayaraq, öz təhlükəsizliyini təmin etmək üçün ilanlar çimərliyə də üz tuta bilər.
“O çimərlik ərazisində daşlı, qayalı, kol-koslu yerlər ilanlar üçün, o cümlədən zəhərli gürzələr üçün təbii yaşayış yeridir. Ona görə də orada gürzələrin olması gözləniləndir. Bədən formasında, sürünməsinə görə gürzə ilanına oxşayır. Amma quyruğunun uzunluğu bir az gürzələrdəkindən qısa olur. Amma həmin görüntüdə quyruq bir az uzun görünür. Su ilanlarının da arasında üstündə xallarına görə gürzəyə oxşayanlar var”, – deyə elm işçisi bildirib.
Bəs bu hal insan həyatı üçün nə dərəcədə təhlükəli ola bilər? Çimərliklərdə ilanlardan qorunmaq üçün ilkin addım olaraq nə etmək lazımdır?
“Ümumiyyətlə, heç bir ilanın insanla qarşılaşdıqda heç bir təhlükəsi yoxdur. O demək deyil ki, ilan çimərliyə yaxınlaşdısa, o, insanlara hücum edəcək. İlanı görərkən dərhal onun üstünə getmək, öldürməyə, zərərsizləşdirməyə çalışmağın özü təhlükəlidir. Çünki belə olduğda ilan, təbii ki, özünü müdafiə etmək üçün sancmağa çalışacaq. Onun üstünə bir əşya, bir materiya – pencək, köynək, əldə nə varsa atılsa, ilan özünü gizlənmiş kimi hesab edəcək”, – deyə İsgəndərov əlavə edib.
Zooloq onu da qeyd edib ki, çimərlikdə belə halla rastlaşanda ilanı zərərsizləşdirmək üçün çimərlikdə olan mütəxəssislərə müraciət etmək lazımdır.
