Azərbaycan Texniki Universitetinin (AzTU) rektoru yenə Vilayət Vəliyev olacaq. Bununla bağlı bu gün, 29 iyul tarixində Azərbaycan Prezidenti İlham Əliyev Sərəncam imzalayıb.
Vəliyev bu vəzifəni 2019-cu ildən tutur.
O, daha öncə - 2009-2019-cu illərdə Azərbaycan Respublikası İqtisadiyyat Nazirliyi İqtisadi İslahatlar Elmi-Tədqiqat İnstitutunun direktoru vəzifəsində çalışıb.
Vəliyev 90-cı illərin əvvəllərindən başlayaraq indiyədək ARDNŞ, BP, UNOCAL, PENNZOIL və digər beynəlxalq neft şirkətlərinin regionda neft-qaz ehtiyatlarının axtarış-kəşfiyyatı, işlənilməsi, istifadəsi və nəqlinin müxtəlif məsələləri, o cümlədən texniki-iqtisadi və kommersiya qiymətləndirmələri, perspektiv inkişaf planları və proqnozları, informasiya bazalarının yaradılması və qərarların qəbulu mexanizm və modellərinin işlənilməsi üzrə çoxsaylı tədqiqat işləri və xidmət layihələri yerinə yetirir.
