Nəsimi rayonu, Xətai prospekti, 38 ünvanında yaşayan bir qrup sakinlərin iddiasına görə, bu bina təxminən 18 il öncə təhvil verilsə də, tikinti aparan şirkət hələ də idarəçiliyi əldən vermək istəmir. Ərazisi kiçik olan məhəllədə avtomobillərin hərəkət etdiyi hissədə kommersiya məqsədilə söhbətgah tikirlər. Bu haqda bu gün, 7 noyabr tarixində Bakuplus.az Real TV-yə istinadən məlumat verir.
Sakinlərin sözlərinə görə, binada fəaliyyət göstərən özəl bağça həyətdə söhbətgahlar tikir, bu isə yanğın zamanı FHN maşınları üçün maneə törədə bilər.
“Onlara 2500 manat məbləğində cərimə də yazılıb. Gördüyünüz bu qurğular 3-cü dəfədir tikilir, 3 dəfə də dövlət qurumları tərəfindən tam darmadağın olunub”, – şikayətçilərin biri İlham ismayılov qeyd edib.
Sakinlərin şikayətləri bununla bitmir. Binanın daxili nizamnaməsinə əsasən, kommunal xidmətlərin ödənilməsi üçün toplanan pullar aidiyyəti üzrə istifadə olunmur. Digər tərəfdən fəaliyyət göstərən bağçanın mətbəx havalandırması olduğu deyilən bu borular da sakinləri narahat edən mövzulardan biridir.
Şikayətçilərin sözlərinə görə, mənzil alanda imzaladıqları müqavilədə hər bir binada sakinlərin istismarına iki lift veriləcəyi qeyd olunsa da, verilən vəd yerinə yetirilməyib.
Məsələ ilə bağlı mübahisənin əks tərəfini təqdim edən “Nəsimi 45” Mənzil Mülkiyyətçilərinin müştərək cəmiyyətinin vəkili Fuad Əyyubovun sözlərinə görə, sakinlərin şikayətləri tam əsassızdır. Vəkil qeyd etdi ki, söhbətgahın yerləşməsi heç bir təhlükə şəraiti yaratmır. Üstəlik söhbətgah kommersiya məqsədilə deyil, bina sakinlərinin xahişi və ianələri ilə onların istifadəsi üçün tikilir. O ki qaldı kommunal ödənişlər məsələsinə, bununla bağlı əksinə, onlar bəzi sakinlərdən şikayətçidirlər. Bu səbəbdən məhkəməyə də müraciət ediblər.
Fuad Əyyubovun sözlərinə görə, aidiyyəti qurumlar tərəfindən cəmiyyətə heç bir cərimə tədbiq edilməyib. Kommunal xidmətlər üçün yığılan məbləğ isə ümumistifadə zonalarının təmizlənməsi, işıqlandırılması, eləcə də binanın anbarına yığılan suyun binaya ötürülməsini təmin edən motorların və liftlərin işlətdikləri enerjini kommunal ödənişi, məişət tullantılarının təmizlənməsi, binanın mühafizəsi, avtomobil dayanacağı və digər məsələlərə xərclənir.
