Xətai rayonu, Gəncə prospektində yaşayan sakinlər istiliklə bağlı şikayət edirlər.
Bu haqda 13 yanvar tarixində Realtv xəbər verib.
Prospektdəki 47,49,51,53,57,61,63,67,69,75,77,79 nömrəli binalarda istilik sistemləri fəaliyyət göstərmir. Mənzillərə istilik verilməməsinin səbəbi istismar müddətini başa vuran borularda yaranan qəza və boruların izolyasiya olunmamasıdır.
Sakinlərin narahatlığına səbəb olan digər amil isə binaların zirzəmisində yığılan su ilə bağlıdır.
“Bakı istilik elektrik mərkəzindən gələn magistral istilik kəmərlərlərində yaranmış müvəqətti texniki problemlərlə əlaqədar həmin binaların istilik təchizatında fasilə yaranmışdır. Bununla əlaqədar olaraq tapşırıq verilmiş və görülmüş zəruri tədbirlər nəticəsində həmin binaların istilik təchizatı bərpa olunmuşdur”, - mənzillərdə yaranan istilik problemi ilə bağlı Azəristiliktəchizat ASC tərəfindən aydınlıq gətirilib.
“Binaların zirzəmisində toplanan su problemi ilə bağlı bizə şikayət daxil olmayıb. Bu istiqamətdə şikayət olunan zaman bizim tərəfdən əraziyə baxış keçirilir. Ehtiyac duyularsa "Azərsu" ASC-yə məlumat verilərək problemin həllinə çalışılır”, - Xətai rayon mənzil kommunal istismar sahəsi açıqlama verib.
